2018年2月26日 星期一

►► 食過翻噚味-和牛燒肉‧純 ◄◄

自從上次食完和牛燒肉‧純之後,真心覺得好好味,
特別一讚係佢地嘅lunch set價錢合理而且非常高質素,
因為呢度嘅肉類供應全部源自日本政府嘅所屬農業組織,
農產經屠宰後再直接冷藏再運送嚟香港,同係日本食無分別!
正宗日式燒肉店,地方整潔而且通風亦都好好,
所以每次食完件衫都唔會有一陣味。
其實呢度除左主打和牛燒之外,
仲有刺身、沙律、壽司、壽喜燒等等,好多唔同種類嘅嘢食。
所以食和牛之前,先食一客沙律做starter,
有青瓜生菜等食落新鮮爽脆,加上紫菜碎及醋汁,
沙律嘅醋汁令到胃口大增,非常醒胃,雖然份量唔多但係對我嚟講啱啱好。
嘩~
見到和牛拼盤就流哂口水啦,最喜歡就係拼盤會有蔬菜伴旁,
可以食和牛時清下油膩感!
特選日本產和牛肉眼 HK$550 (推薦指數:5/5)
真心推薦每次必嗌和牛肉眼,油脂豐腴入口即溶再加埋濃郁牛味,
實在叫人欲把不能,每一口都覺得感覺相當幸福。
油脂分佈極好,所以只需要燒一會就能夠入口,
燒後只要加入少許鹽調味就可以帶出和牛嘅鮮味,
食落完全無筋,轉眼間就已經融化,入口齒頰留香。
日本產和牛牛排肉 HK$320 (推薦指數:4/5)
牛排肉雪花同樣都好細密,
所以個人覺得呢個和牛牛排肉絕對係超值之選,
而且會比較有口感,食落實在好多!絕無欺場。
日本產和牛上牛排肉 HK$205 (推薦指數:4/5)
上牛排肉肉質好厚身,而且紋理平均,
燒後肉汁仍然能夠保存得好好,同樣好好食,
所以我享用和牛燒肉‧純嘅和牛都唔喜歡沾任何調味,
基本上簡簡單單加入少許鹽經已好足夠。
牛舌 HK$108 (推薦指數:3.5/5)
薄切牛舌比起店內嘅厚切牛舌當然會比下去,但係以呢個價錢來說,
份量上都算係幾足,不過牛味同樣幾濃郁下,唔錯。
冬天食燒牛,當然少不了叫多個白飯食,真係好滋味!
雖然呢度每個白飯要成HK$30,不過用日本珍珠米煮成,
都係物有所值嘅,因為日本米煮成嘅白飯真係勁有嚼口同米香。
巨峰同荔枝梳打 HK$55(推薦指數:3.5/5)
再加埋同男友一人一杯嘢飲,呢餐真係好滿足,
飲品清新解渴得嚟又唔算太甜,成餐飯由飲品至主食都好滿足!
相信我又好多再嚟食多次㗎啦~~
聯絡MsJovi:
ww.jovi@ymail.com / www.facebook.com/blogger.ms.jovi/